مسابقة النهارده !!!!!!!!!

الجايزة كارت شحن ب 10 جنيه للفائز

الفرق بين الحمام والعيد ؟

*****

مين اتعس حيوان في الغابه وليه ؟

*****

ليه الصعيدى بيصوم طول السنه ؟

***

اكتب ايميلك مع الاجابه والاجابه الصح بكره

والفايزحبعتله رقم الكارت على الايميل

سلي صيامك ......... مقارنه بين النكت في عهد السادات والنكت في عهد مبارك

دي مقارنه سريعه عملتها بين النكت المصريه في عهد انور السادات وبين النكت المصريه في عهد مبارك
ومن اول وهله حتحس ان الشعب ايام السادات انتقد حاجات كتير اوي انما ما جبش سيرة سرقه ,توريث ولا حتى رغيف العيش
و لان بلدنا بتطور بيهم فالنكت في عهد مبارك هي كمان اتطورت
وده رصد للفرق بين هموم الشعب في عصرين متتالين

نكته من ايام السادات

وهى: أحد الأشخاص يسأل الآخر: السادات السنة دي هل سيحج أم يعتمر فأجابه: لا.. السنة دي «مصهين». ومصهين هنا لها معنيان الأول: مصهين بمعنى غير مهتم، والمعنى الآخر مشتق من الصهيونية، أي التطبيع مع اسرائيل

*************************

فى مرة الهنود عرفو ان ان المصريين لما بيصفوا حد بالغباء بيقولوا علية هندىفلما عرفوا كدة اجتمع السادات مع اميرة غاندى زعيمة الهندف قالت غاندى للسادات لازم تضع عقوبة اللى بيصف الغبى بالهندىرد السادات فعلا احنا حطينا عقوبة اللى يقول كدة يدفع الف جنية قالت غاندى خلاص الغرامة اللى تجيبها تيجى على خزنة الهند قالها لية هو انا هندى

*******************

كان البابا شنودة وشيخ الأزهر والسادات في طائرة وحدثت مشكلة بالطائرة استدعت أن يلقى أحد الركاب من الطائرة فقام الرئيس السادات باختيار سؤال لكل شخص ومن يفشل في الإجابة يلقى من الطائرة ... فذهب إلى شيخ الأزهر وسأله :

" ما هي بلد المليون شهيد ؟ " فأجاب شيخ الأزهر : " الجزائر يا ريس " فنظر السادات شزرا إلى البابا شنودة وقال : " قول لي أسماء المليون شهيد واحد واحد " .

*******************************

دي بقى نكت عن مبارك

------------------------------------
مرة سيادة الريس مد إيده في جيبه لقي 5 مليون جنيه !!

فزعل قوي وخاف وقال: إيه الفلوس دي الفلوس دي حرام؟

فسأل أحد مساعديه فدله على طريق الشيخ طنطاوي

رئيس الأزهر وقال له: اسأل الشيخ وهو يقول لك الحل .

ما كدبش خبر وجري على طنطاوي وحكا له القصة فرد :

5 مليون بس .. إيه النزاهة دي؟

دي بسيطة خالص يا ريس ما تزعلش نفسك؟

كل اللي هتعمله هتروح تستغفر ربنا بالطواف حوالين الكعبة، لفة لكل مليون
جنيه وخلاص .
الريس راح لقي عمنا صفوت فقال له: أنت بتعمل إيه هنا؟

أنت هتلف كام لفة؟

عمنا صفوت :78 لفة .

الريس: يخرب بيتك؟ ده أنت خربت البلد !!

عمنا صفوت: أنت جاي علي انا؟ روح شوف علاء ابنك جايب

موتوسيكل وبقاله 3 أيام بيلف

.

************************************

.

كان حسني مبارك بيخطب في الشعب .. فكل شويه واحد يقوم ويقول

عاش حسني مبارك موحد الاديان ويقعد

يروح حسني مكمل كلامه وشويه ويقوم الراجل

ويقول عاش حسني مبارك موحد الاديان

فااتمسك امن دوله وطااااااااخ ويقولوله ايه الي انت

بتقوله دا ازاي موحد الاديان

دي مصر فيها مسيحين ويهود ومسلمين وطااااااخ

فرد عليهم يا باشا ماهوه اللي مكفرنا كلنا

----------------------------------

**************************

قولي بصراحة يا نظيف وبلاش مجامله او النفاق .

نظيف : أمرك يا ريس

الريس : أنا الأفضل ولا عبدالناصر ؟

نظيف : انت طبعا يا ريس .. جمال مين اللى كان بيخاف من الروس !!

الريس : طيب أنا الأفضل ولا السادات ؟

نظيف : سادات مين ياريس اللى كان بيخاف من الأمريكان !!

الريس : طيب أنا الأفضل ولا عمر بن الخطاب ؟

نظيف : انت طبعا يا ريس .. عمر بن الخطاب كان بيخاف من ربنا . انت لا

************************************

علاء مبارك شارك في من سيربح المليون و وصل لآخر سؤال السؤال : من هو اكبر حرامي في مصر ؟ طلب مساعدة صديق واتصل بأخوة جمال وقاله السؤال رد عليه اخوه : انسحب باللي كسبتوا وما تخسرش أبوك!!

.

*************************

.

مرة واحد تاه فى الصحرا وبص لقى المصباح فرح قوى وراح دعك المصباح بسرعة طلع

منه الجنى وحط المطواه على رأس الراجل وقاله هات كل اللى معاك بسرعة الراجل

استغرب وقاله : ايه ده هو انت مش مصباح على الدين قاله : لا انا مصباح علاء مبارك

.

************************************

.

بيقولو للريس: يلا عشان تقول خطابك الاخير

قالهم : ليه؟

هو الشعب رايح فين؟؟

.

**************************************

مسلسلات رمضان 2008

قبل السحور وعلشان كل واحد يعرف يظبط يومه بكره


فدي خريطة مسلسلات رمضان 2008


وانا عن نفسي حتابع 3 مسلسلات بالكتير


علشان احافظ على حبة مخ لاخر الشهر

الدالي

اللي مزهقش من الدالي 1 وحاسس انه قادر يكمل رغم الرغي والتطويل والملل اللي في المسلسل ياخد عنده الجزء التاني برغيه وتطويله وسلاطته وبابا غنوجه على الحياه الساعه

11:50

شرف فتح الباب

المسلسل ده غالي عليه لسبب خاص كلام في سرك المسلسل متصور عندنا في مطروح تابعه على بانوراما دراما 1 الساعه 4 العصر

بنت من الزمن ده

مع اني بستتقل مدها " داليا البحيري " بس بارده حيتذاع مسلسها على دريم الساعه 7:30

نسيم الروح

بيعتبر الكثير وانا منهم ان دي الفرصه الاخيره لمصطفى شعبان علشان يثبت نفسه في التلفزيون بعد ما قدر انه يضيع كل الفرص اللي جاتله في السينما حيتذاع مسلسله على الحياه مسلسلات الساعه 4:30 العصر

شط اسكندريه

فنان جميل قربنا ننساه " ممدوح عبد العليم " راجع بشط اسكندريه الساعه 1 على بانوراما دراما 1

بعد الفراق

مفاجأة رمضان السنه دي هند صبري وخالد صالح في مسلسل متوقع انه يكون فاكهة رمضان حتشوفه الساعه 10 الصبح على otv

في ايد امينه

لو عايز تتفرج على حبة هجص مصري وكوكتيل اشتغلات اوعى تفوت مسلسل يسرا على دبي الساعه 2 الضهر

ظل المحارب

المسلسل رغم انه مش جي على القنوات الارضيه الا ان من الواضح في التترات ان المسلسل جامد جدا وحيجي على الراي والكويت

عدى النهار

من اسمه تحس ان صلاح السعدني حيقدم عمل ممتاز والمسلسل حيشتغل في الحياة مسلسلات الساعه 1 الضهر

قلب ميت

عوده للفنا ن الجامد جدا شريف منير بعد غياب 12 سنه وحنستناه على الحياة الساعه 10:50 الصبح

وباي بقى علشان اروح اتسحر

رمضان معانا احلى

رمضان معانا احلى

ذي ما رمضان ما ينفعش من غير الفانوس والمدفع والكنافه ويحيى الفخراني

بارده ماكنتش اقدر اعدي المناسبه دي من غير حتى ما اقول كل سنه وانتوا طيبين وكل

واحد وليه طريقته

وملاقيتش احلى من المدونه دي علشان نكون مع بعض كل يوم في رمضان نتكلم ونهزر

ونحكي ونسلي صيامنا

وربنا يجعل دمنا خفيف على بعض

حبة مواضيع حنتكلم فيها :

سلي صيامك .. مع البوست ده حيكون في كل يوم مسابقه وجوايز كمان (يعني مش ناشفه )

قبل الفطار .. .. هنا بقى حنهزر مع بعض شويه كل يوم قبل الفطار بساعتين كده

على الماشي ... مش معقول حننسى السياسه والبلد

عبره .. .. .. .. قصص وعبر من زمان واي حد عنده حاجه (ميستبخلش ) ويقولنا

فنون رمضان .. في رمضان ما فيش اكتر من المسلسلات والبرامج وكل يوم حنمسك مسلسل ونقطع في فروته

حبشتكنات .... من اسمها باينه

الف ليله ... مندى للقصه القصيره واللي عايز يحكي يتفضل

ابداع .... وقبل ما نقفل فكل اللي عنده ابداع من شعر او اغاني او حتى كاميرا خفيه يبعتلنا

***********************

*************************

*********************************

الان

باب الاشتراك مفتوح للكتابه في

المدونه الالكترونيه

رمضان

كل اللي عليك انك تكتب ايميلك

في التعليقات تحت

واحنا حنبعتلك رسالة للاشتراك

على الايميل واول ما توافق عليها حتكون اشتركت

وعلى فكرة في جايزه في اخر رمضان لافضل مدون على المدونه